കടഞ്ഞെടുത്തപോലൊരു കുട്ടി – ബോബ് ദിലൻ

Image courtesy: Josh Silver

(കവിയും പാട്ടുകാരനുമായ ബോബ് ദിലൻ (Bob Dylan) 1984-ൽ രചിച്ച Clean Cut Kid എന്ന കവിതയുടെ പരിഭാഷ)   

എല്ലാവർക്കുമറിയണം, അവനെന്തുകൊണ്ടാണ് ഒത്തുപോകാൻ പറ്റാഞ്ഞതെന്ന്?
അവനെന്തിനോട് ഒത്തുപോകാനായില്ലെന്നാണ്?
ഒരു തകർന്ന സ്വപ്നത്തോടോ?

അവൻ, കടഞ്ഞെടുത്തപോലൊരു കുട്ടിയായിരുന്നു
പക്ഷെ, ആളുകൾ അവനിൽനിന്നും പുറത്തെടുത്തത് ഒരു കൊലയാളിയെയാണ്
അതെ, അതാണവർ ചെയ്തത്.

ആളുകൾ അവനോടു മുകളിലുള്ളതു താഴെയാണെന്നും
ഇല്ലാത്തത് ഉണ്ടെന്നും പറഞ്ഞു.
അവരവന്റെ തലയിലേക്ക് ചിന്തകൾ കുത്തിത്തിരുകി,
അവ അവന്റേതാണെന്ന് അവൻ കരുതി.

അവൻ പന്തുകളി ടീമിലുണ്ടായിരുന്നു
അവൻ കലാജാഥാസംഘത്തിലുണ്ടായിരുന്നു
പത്തുവയസ്സുള്ളപ്പോൾ അവനൊരു കുമ്മട്ടിക്കാപീടികയുമുണ്ടായിരുന്നു,

അവൻ ഞായറാഴ്ചകളിൽ പള്ളിയിൽ പോയി
കുട്ടികളെ നല്ല പൗരന്മാരാക്കുന്ന സംഘത്തിലും അവനുണ്ടായിരുന്നു
ചങ്ങാതികൾക്കുവേണ്ടി, അവനവന്റെ പോക്കറ്റുതന്നെയും പുറത്തെടുത്തു.

ആളുകൾ പറഞ്ഞു, “നീ വെറുമൊരു ശിശുവാണ്‌”
അവനെയവർ ആകാരവടിവിനായി തിരുമ്മുകേന്ദ്രത്തിലേക്ക് പറഞ്ഞുവിട്ടു
അവരവനു പുകയ്‌ക്കാൻ കഞ്ചാവു കൊടുത്തു,
മദ്യവും ഗുളികകളും കൊടുത്തു
ഓടിക്കാനൊരു ജീപ്പും, ചിന്താൻ രക്തവും കൊടുത്തു

അവർ പറഞ്ഞു, “കൊള്ളാം, നിനക്കു വേണ്ടതൊക്കെയായിരിക്കുന്നു”
എന്നിട്ടവർ അവനെ അന്തമില്ലാത്ത പരക്കംപാച്ചിലിലേക്ക് പറഞ്ഞുവിട്ടു.

അമേരിക്കൻ സ്വപ്‌നങ്ങൾ അവൻ വിലയ്ക്കുവാങ്ങി,
പക്ഷെ, അതവനെ കടത്തിലാക്കി
ആകെക്കൂടെ അവനു കളിക്കാനാകുമായിരുന്നത് റഷ്യൻ റൂലെറ്റാണ്¹

അവൻ കൊക്കകോള കുടിച്ചു
വണ്ടർ ബ്രെഡും ബർഗർ കിങ്ങ്സും കഴിച്ചു
അവൻ നന്നായി തീറ്റിപ്പോറ്റപ്പെട്ടിരുന്നു.

പീറ്റർ ഒതൂളിനെ² കാണാൻ അവൻ ഹോളിവുഡിൽ പോയി
അവനൊരു റോൾസ് റോയിസ്സു മോഷ്ടിക്കുകയും
അതു നീന്തൽക്കുളത്തിലേക്ക്‌ ഓടിച്ചിറക്കുകയും ചെയ്തു

അവൻ, കടഞ്ഞെടുത്തപോലൊരു കുട്ടിയായിരുന്നു,
പക്ഷെ, ആളുകൾ അവനിൽനിന്നും പുറത്തെടുത്തത്

ഒരു കൊലയാളിയെയാണ്
അതെ, അതാണവർ ചെയ്തത്.

അവന് ഇൻഷുറൻസ് വിൽക്കാമായിരുന്നു
അവനൊരു ഹോട്ടലിന്റേയോ മദ്യശാലയുടെയോ ഉടമയാകാമായിരുന്നു
അവനൊരു കണക്കപ്പിള്ളയോ ടെന്നീസ്താരമോ ആകാമായിരുന്നു

ഒരു ദിവസം ഗോൾഡൻഗേറ്റ് പാലത്തിൽനിന്നും താഴെ ചൈന കടലിടുക്കിലേക്ക് അവനെടുത്തു ചാടി,
ബോക്സിങ് കൈയ്യുറകളും ധരിച്ചുകൊണ്ട്.

അവന്റെയമ്മ മുറിക്കുള്ളിലൂടെ നടന്നു
അച്ഛൻ തേങ്ങുകയും മോങ്ങുകയും ചെയ്തു
ഒരു വാടകവീട്ടിലാണ് അവർ അന്തിയുറങ്ങിയിരുന്നത്

അതെ, എല്ലാവരും ചോദിക്കുന്നു… അവനെന്തുകൊണ്ടാണ് ഒത്തുപ്പോകാൻ പറ്റാഞ്ഞതെന്ന്?

അവനെന്നും ആകെ വേണ്ടിയിരുന്നത്, വിശ്വസിക്കാൻപ്പറ്റുന്ന ഒരാളെയായിരുന്നു
ആളുകൾ അവന്റെ തലതിരിച്ചുകളഞ്ഞു
ഇതെല്ലാം എന്തിനുവേണ്ടിയായിരുന്നുവെന്ന് അവനൊരിക്കലും മനസ്സിലായില്ല.

അവനൊരു സ്ഥിരജോലിയുണ്ടായിരുന്നു
അവൻ പള്ളിയിലെ പാട്ടുസംഘത്തിൽ ചേർന്നിരുന്നു
ഇങ്ങനെയൊരു അറ്റകൈ അവന്റെ ചിന്തയിലേ ഉണ്ടായിരുന്നില്ല

അവൻ, കടഞ്ഞെടുത്തപോലൊരു കുട്ടിയായിരുന്നു
പക്ഷെ, ആളുകൾ അവനിൽനിന്നും പുറത്തെടുത്തത്

ഒരു കൊലയാളിയെയാണ്
അതെ, അതാണവർ ചെയ്തത്.

---

1. ഒരുതരം ചൂതുകളി – ഈ കളിയിൽ, ഒരാൾ തന്റെ റിവോൾവറിൽ ഒരു വെടിയുണ്ടയിടുന്നു. റിവോൾവറിലെ സിലിണ്ടറിൽ ഉണ്ടയിടാവുന്ന മറ്റു കള്ളികൾ ഒഴിഞ്ഞു കിടക്കും. തുടർന്നയാൾ സിലിണ്ടർ സ്ഥാനത്തുറപ്പിച്ച് സ്വയം വെടിവെക്കുന്നു. ആയുസ്സിന്റെ ബലംപോലെ വെടിയുതിരുന്നത് ഉണ്ടയുള്ള ഭാഗത്തുനിന്നാകാം അകാതിരിക്കാം.
   ↩︎
2. ഒരു ചലച്ചിത്രതാരം
   ↩︎